DARPARIAETHAU YN YR YSGOL

Mae prosiect Cynnydd, sy'n cael ei arwain gan Gyngor Sir Penfro, ac sydd hefyd yn gweithredu ar draws Ceredigion, Sir Gaerfyrddin, Abertawe a Chastell-nedd Port Talbot, wedi derbyn £11.5m yn ychwanegol o Gronfa Gymdeithasol Ewrop.

Mae'r prosiect yn gweithio gyda Gyrfa Cymru, colegau AB a chwmnïau preifat a thrydydd sector, i helpu pobl ifanc i gael gwaith drwy gyfleoedd hyfforddiant a phrofiad gwaith, tra'n darparu mentora, hyfforddi a chwnsela un-i-un i wella sgiliau bywyd a hunan-barch.

Cyhoeddodd Jeremy Miles y bydd Cynnydd, a lansiwyd ym mis Medi 2016, yn para tan fis Rhagfyr 2022 diolch i gyllid ychwanegol yr UE. Mae hyn yn golygu y bydd 3,200 o bobl ifanc eraill yn elwa o gymorth a chyfleoedd a grëwyd gan y prosiect dros y 3 blynedd nesaf, a chyfanswm o 7,500.

Dywedodd Jeremy Miles:
"Rydym eisoes wedi gweld pa mor llwyddiannus y mae Cynnydd wedi bod yn gweithio gyda phobl ifanc yn yr ardal i ddileu rhai o'r rhwystrau iddynt gwblhau rhaglenni addysg a hyfforddiant a all gyfrannu at y gostyngiad yn nifer y bobl ifanc yng Nghymru sy'n NEET. Mae hyn mor bwysig, nid yn unig i'r economi leol, ond i gynaliadwyedd ein cymunedau, yn enwedig mewn rhannau o gefn gwlad Cymru."

"Mae Cymru'n dal i elwa'n sylweddol o gronfeydd yr UE ac rwy'n falch iawn y bydd y buddsoddiad hwn yn cefnogi dyfodol cynifer o bobl ifanc yn Ne-orllewin Cymru."

Dywedodd y Cynghorydd David Lloyd, Aelod Cabinet Addysg Cyngor Sir Penfro, ei fod yn falch iawn o groesawu'r cyllid ychwanegol:
"Rydym yn angerddol am barhau â'n gwaith caled tuag at ddileu NEETS. Ni ddylai neb adael yr ysgol heb unman i fynd."

Yn ystod y degawd diwethaf, mae prosiectau a ariennir gan yr UE wedi creu 45,000 o swyddi newydd a 13,000 o fusnesau newydd ledled Cymru, tra hefyd yn helpu dros 85,000 o bobl i gael gwaith.